БИШКЕК, 5-июн. — Sputnik. Баткен облусуна караштуу Лейлек районундагы кыргыз-тажик чек арасындагы абал турукташты. Бул тууралуу Мамлекеттик чек ара кызматынан билдиришти.
Эки мамлекеттин чек арачылары жолугуп, тактала элек чек ара сызыгында өзүн алып жүрүү эрежесин мындан ары бузбоо боюнча сүйлөшүү жүргүзүп, үч тажик аскери коңшуларга өткөрүп берилген.
"Эки өлкөнүн Чек ара кызматынын өкүлдөрү аскер прокуратурасы тарабынан окуя боюнча бир тараптуу иликтөө жүргүзүүнү макулдашты. Ошондой эле 6-июнда Кыргызстандын Чек ара кызматынын төрагасы менен Тажикстандын УКМКсынын башчысынын жолугушуусу пландалды. Алар кырдаалды талкуулап, мындай окуялар кайталанбашы үчүн чара көрөт", — деп айтылат маалыматта.
Учурда Кыргызстандын чек арасылары жергиликтүү бийлик органдары менен биргеликте калк арасында түшүндүрүү иштерин жүргүзүп жатат.
