БИШКЕК, 29-май — Sputnik. Президент Сооронбай Жээнбеков 29-майда КРдин Куралдуу күчтөрүнүн кызматкерлери үчүн салынган үйдүн салтанаттуу ачылыш аземине катышып, 54 батирдин ачкычын тапшырды. Бул тууралуу өлкө башчынын маалымат кызматы кабарлады.
Жээнбеков аскер кызматкерлерин бүгүнкү майрамы менен куттуктап, 1992–жылдын 29-майында өлкө аймагында жайгашкан аскердик түзүлүштөр Кыргыз Республикасынын юрисдикциясына алынып, алар улуттук Куралдуу Күчтөрдүн негизин түптөгөнүн белгиледи.
"Азыркы убакта кыргыз армиясы бир кыйла ийгиликтерге жетти. Азыр учурдун талабына жооп бере турган армиябыз түптөлдү деп айтсак болот. Армиянын баркы жогорулап, жоокердик милдетин аткарууну каалаган жаштардын саны өсүп жатат. Күжүрмөн аскердик салттар кайрадан калыбына келип, солдаттар менен офицерлерге карата коомдун сый мамилеси күчөдү", — деди президент.
Өлкө башчы жалпысынан 2481 батирлүү 77 турак жайдын курулушу аяктаганын, ушу тапта 1250 батирлүү 22 объектинин курулушу жүрүп жатканын белгиледи.
