БИШКЕК, 26-май — Sputnik. Ысык-Көлдө 24-май түнү жааган кар 17 миллион 746 миң 213 сомдук материалдык чыгып алып келди. Бул тууралуу ӨКМден кабарлашты.
Эскерте кетсек, Нарындын Ат-Башы менен Көлдүн Ак-Суу, Тоң, Түп жана Ысык-Көл райондорунун тоолору менен жайыттарына кар жаап, мал өлгөн.
Акыркы маалымат боюнча Тоңдо бир жылкы, жети уй жана 240 баш кой өлсө, Ак-Сууда малчылар үч жылкы, төрт кулун, төрт музоо менен 139 баш коюнан кол жууган. Ысык-Көл районунда 32 жылкы, 38 уй жана 2008 кой өлгөн. Ал эми Түптө 59 баш кой кар алдында калган.
Жалпы жонунан облус боюнча 36 жылкы, төрт кулун, 45 уй, төрт музоо жана 2446 кой кырылганы айтылды.
Жеринде Жарандык коргонуу комиссиясы, ӨКМдин техникасы жана жергиликтүү тургундар иштеди.
Ал эми Ат-Башыда 23-май күнү кечинде калың кар түшүп, Ак-Сай өрөөнүндөгү Үч-Эмчек жайлоосунда чабандардын 800 кой-эчкиси жоголгон. Эки күндөн кийин 472 майда жандыгы аман табылса, 215 койдун өлүгү табылган. Ушу тапта 113 кой изделип жатат.
