БИШКЕК, 22-май — Sputnik. Президент Сооронбай Жээнбеков бүгүн, 22-майда ЕККУнун башкы катчысы Томас Гремингерди кабыл алды. Бул тууралуу мамлекет башчынын маалымат кызматынан кабарлашты.
Жээнбеков Томас Гремингердин Кыргызстанга келиши өлкөдөгү жүрүп жаткан демократиялык реформалар багыты ЕККУ тарабынан колдоого алынып жаткандыгын көрсөтөрүн белгиледи.
"2005-2010-жылдары Кыргызстанда болуп өткөн окуялар диктатуранын жана парламенттик демократиянын кагылышы болуп саналат. Эл аралык коомчулуктун, анын ичинде ЕККУнун колдоосу менен өлкөбүз оор сыноолорду жеңип, мамлекеттүүлүгүбүздү сактап калдык. Өткөн президенттик шайлоо Кыргызстандын демократиялык жол менен кетип жаткандыгынын ишенимдүү далили болду. Биз парламентаризмди тандап алдык жана бул жолдон тайбайбыз, анткени мамлекеттин келечеги парламенттик демократияга байланыштуу", — деп өлкө башчы билдирген.
Ошондой эле президент Томас Гремингерди ЕККУнун Кыргызстандагы ишмердигинин 20 жылдыгы менен куттуктап, мындан ары да жемиштүү кызматташууга ишенимин билдирди. Ал эми ЕККУнун күздөгү Парламенттик Ассамблеясы Кыргызстанда өтүп, иш-чара өлкөдөгү парламентаризмди бекемдөөгө көмөк болорун белгиледи.
Томас Гремингер өз учурунда Кыргызстанда демократиялык институттар ырааттуу өнүгүп жатканын белгилеп, республикадагы адам укуктарын коргоо боюнча жакшы жагдайларга токтолду.
"Биз сөз эркиндигин коргоого багытталган Сиздин чечимдерди канааттануу менен кабыл алдык. Ошондой эле жарандык сектордун өлкөнүн өнүгүшүнө кошкон салымын баалаганыңызга кубанычтабыз. ЕККУ мыйзам үстөмдүгүн камсыз кылуу, сөз эркиндигин жана адам укугун коргоо, жарандык коомду колдоо сыяктуу принциптерге таянган парламенттик демократияны бекемдөө иштеринде Кыргызстанды колдойт", — деди Гремингер.
Ал ошондой эле ЕККУ өкмөттүн "Таза коом" долбоорун ишке киргизүүнү камтыган бир катар иш-чараларды жүзөгө ашырууну улантаарын белгиледи.
