БИШКЕК, 15-май — Sputnik. Исхак Раззаков атындагы Кыргыз мамлекеттик техникалык университетинин "Металлдардын эс-тутуму" илимий-изилдөө лабораториясына анын негиздөөчүсү, физика-математика илиминин доктору, аталган университеттин профессору Сарбагыш Абдрахмановдун ысымы берилди. Бул туурасында анын кесиптештери билдиришти.
Маалыматта аталган илимий-изилдөө лабораториясы эс-тутуму бар материалдардын теориясын жана аны эсептөө методикаларын изилдөө боюнча КРдеги жалгыз илимий борбор экендиги айтылат. Бул лабораторияны Абдрахманов өмүрүнүн акырына чейин жетектеп келген. Окумуштуу 2017-жылдын 29-декабрында узакка созулган оорудан кийин кайтыш болгон.
"Ал киши баштаган илим Кыргызстанда гана эмес, КМШ чөлкөмүнда да жакшы изилдене элек эле. Дүйнө жүзүндө Америкада гана бир жерде ушул багытта иштер жүргүзүлүп жатыптыр. Ал ушул тууралуу акыркы күндөрүндө маектешип жатканыбызда айтып берген эле. Ал адам катары да адилеттүү, акылман, сабырдуу киши болчу. Педагог катары да эң кыйын, оор темаларды балдарга жөнөкөй тил менен түшүндүрүп берчү. Ал кишинин университеттин өнүгүүсүнө кылган эмгегин баалап, өзү негиздеген лабораторияга ысымын берели деген чечим чыгардык", — деди Раззаков атындагы Кыргыз мамлекеттик техникалык университеттин ректору Мураталы Жаманбаев.
Абдрахманов катуу нерселердин майышуу механикасы, материалдардын каршылыгы, бекемдик жана ийкемсиздик, машина куруудагы конструкцияларды эсептөө боюнча белгилүү адис болгон. Көптөгөн илимий эмгектердин автору.
Инженердик билим берүүнү өркүндөтүүдөгү чоң эмгеги үчүн 1999-жылы КР президенттин Жарлыгы боюнча "Кыргыз Республикасынын билимине эмгек сиңирген ардактуу кызматкер" деген наам берилген. 2005-жылы ал Кембридж университетинин биографилык борборунун "Дүйнөнүн алдыңкы мугалимдери" деген номинациясындагы эксклюзивдик тизмекке киргизилген.
Абдрахманов иштеп чыккан эс-тутуму бар материалдардын майышуу теориясы дүйнө жүзүнө таанылган. Маселен, анын илимий ачылыштары төрт томдуктан турган Бүткүл россиялык маалымдама колдонмосуна киргизилген.
Сарбагыш Абдрахманов 1943-жылы 12-январда ыйык Ысык-Көл кылаасынын Темир айылында төрөлгөн.
