Чет элдиктер кыргыз кызына үйлөнсө мамлекетке 100 миң доллар төлөсүн. Мындай пикирин Такен Молдакулов Sputnik Кыргызстан радиосунун 26-апрелинде болгон эфириндеги талкууда билдирди.
Талкуу жарандык активисттер сунуштаган "26 жашка чейинки кыздарга чет жакка иштөөсүнө тыюу салуу" демилгесинин айланасында болгон.
Молдакуловдун айтымында, башка өлкөнүн жарандары менен баш кошкон кыздардын көпчүлүгү 4-5 жылдан соң ажырашып кетсе, укуктары корголбой калууда.
"Биздин бул демилгебизге күлүп жаткандар болууда, бирок биз ага да көз жуумп сунуштап жатабыз. Мыйзамдын негизинде биздин кыздарга үйлөнгөн чет элдиктер акча төлөй турган кылышыбыз керек. Ошондо алардын жоопкерчилиги күчөйт", — деди ал.
Адвокат, мындан сырткары, башы бош деген тастыктама, ден соолугу тууралуу билдирме да талап кылуу зарылдыгын кошумчалады.
Белгилей кетсек, радиоэфирге акыйкатчынын орун басары Гүлнара Жамгырчиева, жарандык активист Тилек Таалайбеков, "Кыздар федерациясы" коомдук уюмунун өкүлү Мырзабай Дооранов катышкан.
Эскерте кетчү жагдай, респонденттин пикири редакциянын көз карашына дал келбей калышы мүмкүн.
