БИШКЕК, 10-апр. — Sputnik. Казакстандын Коргоо министрлиги өзүнүн аскер кызматкерлерин Ливанга тынчтык жарчысы катары жиберет. Бул тууралуу министрдин орун басары Талгат Мухтаровго шилтеме берип Sputnik Казакстан агенттиги жазды.
Мухтаровдун айтымында, учурда бул маселе боюнча ири масштабдагы даярдыктар жүрүп жатат.
"Биз бардык тиешелүү иш-чараларды өткөрдүк. Эми БУУнун талаптарына жооп берүү үчүн бир канча стандарттык кадамдарды жасашыбыз керек. Ушул жылдын күз айларында 120 жоокерден турган ротаны жөнөтөбүз. Алдын ала айта турган болсок, бул миссия Ливанда ишке ашмакчы", — деди Мухтаров.
Мындаш тышкары, министрдин орун басары өлкөдө тынчтык орнотуу ишмердүүлүгү боюнча мыйзам кабыл алынып, анда аскер кызматкерлеринин коопсуздугу, кепилдиктер жана социалдык маселелер боюнча суроолор каралганын кошумчалады.
