Раимбеков: маршрутка айдап күнүнө 2000-3000 сом табам
Маршрутка айдап күнүнө 2000-3000 сом табабыз. Бул тууралуу айдоочу Ренат Раимбеков Sputnik Кыргызстан радиосуна маек куруп жатып билдирди.
Анын айтымында, эл көп түшкөн каттамдарда гана 3000 сом, ал эми башкаларда 2000 сом пайда түшөт.
"Маршрутка айдап күнүнө 2000-3000 сом тапса болот. Бирок айтып кетүүчү жагдай, ошол акчанын 1000 сому арендага, 1000 сому бензинге кетип, айдоочунун өзүндө 1000 сомго чукул эле акча калат. Ошентип таңдан кечке дейре үй бетин көрбөй жүрүп айына 20-25 миң сом пайда көрөбүз", — деди Раимбеков.
Ал унаанын кыймылдаткычын оңдоого эле 100 миң сом кетерин, ал эми ай сайын майда-чүйдө ремонтторго да көп акча чыгымдаларын кошумчалады.
