БИШКЕК, 3-апр. — Sputnik. Туруктуу аткезчилик каналы кыргыз-өзбек чек арасынан аныкталды. Бул тууралуу Мамлекеттик чек ара кызматынан кабарлашты.
Билдирмеге караганда, дүйшөмбү күнү, 2-апрелде, чек арачылар мыйзамсыз негизде 59 кап пахтанын үрөнүн алууга аракет кылып жаткан сегиз кыргызстандыкты кармаган. Окуя кыргыз-өзбек чек арасында болгон. Алдын ала эсептөөлөр боюнча атакезчиликтин жалпы баасы 100 миң сомду түздү.
"Кармалгандар мыйзамды түз бузбастан, товарды чек арадан ыргытып алып өтө баштаган. Буга байланыштуу мыйзамсыз аракеттерге бөгөт коюу максатында атайын иш-чаралар өткөрүлүүдө", — деп ведомствонун Жалал-Абад облусу боюнча башкармалыгынын башчысынын орун басары Таалайбек Тажибаев билдирди.
Кармалгандарга айып салынып, мыйзамсыз кирген товар Мамлекеттик чек ара кызматынын аймактык бөлүмүнүн кызматкерлерине өткөрүп берилди.
