БИШКЕК, 2-апр. — Sputnik. Премьер-министр Сапар Исаков эл ташыган фирмалардан жең ичинен канча каражат чогултулуп жатканы тууралуу маалыматы бар экенин айтты.
Бул тууралуу өкмөт башчынын Бишкектеги транспорт ишканаларынын ишмердүүлүгү боюнча өткөргөн жыйынында сөз болду.
"Мага жеткен маалыматтарга караганда Транспорт министрлигинин алдындагы транспорт инспекциясына ишканалардын ар бир бригадасы айына үч миң сомдон берип турат экен. Министр Жамшитбек Калилов бир жуманын ичинде чара көрсүн. Мыйзам баарыбыз үчүн бирдей. Шаардыктардын жолдогу коопсуздугун камсыз кылуу үчүн мыйзам нормалары так аткарылышы керек", — деди Исаков.
Ал кошумчалагандай фирмалар министрликтен тышкары, Жол кыймылы коопсуздугун камсыздоо башкармалыгынын кызматкерлерине дагы айына беш миң сомдон көбүрөөк акча берип турары айтылган.
Исаков белгилегендай, ушул сыяктуу коррупциялык аракеттер расмий төлөмдөргө кедергесин тийгизип, жеке компаниялардын нааразычылыгын жаратууда.
Ошондой эле ал шаардагы транспорт көйгөйүн чечүү үчүн тез арада автобустарды киргизүү маселесин чечүү керектигин айтты.
Эске салсак, маршрутка айдоочулары 1-апрелден баштап киргизилген милдеттүү камсыздандыруу боюнча нааразычылыгын билдирип жатышат.
Камсыздандыруунун бир орун үчүн жылдык баасы — 136 сом. Эгер унаа шаарлар аралык каттамдарды аткарса — 204 сом.
