БИШКЕК, 23-мар. — Sputnik. Өкмөт Баш прокуратурага кошумча 250 миллион сом берген, себеби көзөмөл органы доо арыздын негизинде мамлекетке төгүлгөн акчанын 30 пайызын ала алат. Бул туурасында өкмөттүн маалымат кызматынан кабарлашты.
Басма сөз бөлүмүнөн бир катар маалымат агенттиктери акча бөлүнгөнү тууралуу жазгандыгын айтышты. Анда былтыр Баш прокуратура "Альфа Телеком" (MegaCom) жана "Brasfort limited" компаниясынын ортосундагы насыялык макулдашуудан мыйзам бузган учурларды тапкан. Анын жыйынтыгында мамлекеттин 5 миллиард 416 миллион сому кайтарылган.
"Былтыркы жылдын 4-майында Бишкектин соту өндүрүлгөн акчанын 30 пайызын, тагыраагы, 1 миллиард 624 миллион сомду прокуратура органдарына берүүгө чечим чыгарган. Өкмөттүн 2017-жылдын 21-сентябрдагы буйругуна ылайык, 250 миллион сом берүү ЖКнын Финансы жана бюджет боюнча комитети менен макулдашылган", — деп айтылат маалыматта.
Негизинен көзөмөл органына 47,1 миллион сом бөлүнгөн. Өкмөттөн бул акча прокуратура кызматкерлеринин социалдык маселелерин чечүүгө арналганын айтышты. Ал каражатка кызматтык имараттарды оңдоп-түзөп, компьютерлерди сатып алып жана форма тиктирүүгө мүмкүнчүлүк жаралган.
