БАТКЕН, 23-мар. — Sputnik. Баткен шаарында Нооруз майрамынан кийин дайынсыз жоголгон төрт бала милиция кызматкерлери тарабынан Кадамжайдагы Халмион базарынан табылды. Бул тууралуу шаардык милициянын өкүлү Асылбек Максутов билдирди.
Анын айтымында, балдар биргеликте Бишкек шаарына барууну көздөшкөн.
"Алар алгач Баткен шаарындагы борбордук стадинго майрамдык салтанатты көрүү үчүн келишкен. Андан соң Төрт-Көл суу сактагычына барышкан. Ал жерден жолдон өткөн унаалар менен Кадамжайдагы Халмион базарына барышкан. Ал жерде эки күн көчөдө түнөшкөн", — деди Максутов.
Ал ошондой эле 16 жаштагы Бекболот Кубат уулу балдарды Бишкек шаарына барууга үндөгөнүн айтты.
Бекболот Кубат уулу буга чейин Баткен райондук ички иштер башкармалыгында каттоодо тургандыгы маалым болду. Учурда алардын ата-энелерине түшүндүрүү иштери жүргүзүлүп жатат.
