ОШ, 23-мар. — Sputnik. Кара-Суу районунун Кашкар-Кыштак айыл аймагынын Жаңы-Чек айылында 15 жаштагы өспүрүмдү унаасы менен коюп изин жашырып кеткен айдоочу кармалды. Бул тууралуу облустук Жол кыймылы коопсуздугун камсыздоо бөлүмүнүн өкүлү Алтынбек Теңизбаев билдирди.
Эске сала кетсек, окуя 20-мартта саат 22.30дар чамасында Бишкек — Ош унаа жолунун 643-чакырымында болгон. Жабырлануучу алган жараатынан улам мүрт кеткен.
"Белгисиз унаа 15 жаштагы баланы велосипед тээп бара жаткан жеринен койгон. Оор жаракат алган бала ошол жерден жан берген. Ал эми айдоочу изин жашырууга үлгүргөн. Ыкчам издөө иштеринин негизинде 23-мартта "ВАЗ 2107 Жигули" үлгүсүндөгү унаанын 59 жаштагы айдоочусу, Кара-Суу районунун тургуну кармалды", — деди Теңизбаев.
Шектүүнүн унаасы айып короого токтотулуп, өзү убактылуу кармоочу жайга киргизилди. Учурда тергөө амалдары жүрүп жатат.
