БИШКЕК, 6-мар. — Sputnik. Бишкек шаарынын өрт өчүрүүчүлөрү орто эсеп менен 11 миң сом маяна алат. Бул тууралуу Өзгөчө кырдаалдар министрлигинин маалымат кызматынан билдиришти.
Эске салсак, дүйшөмбү күнү Өзгөчө кырдаалдар министрлигинин өрт өчүрүү кызматынын имаратынын алдына куткаруучулар митингге чыккан. Акцияга катышкандар айлык акы себепсиз кыскартылып жатканын айтып, көтөрүп берүүнү талап кылышкан.
"Өрт өчүрүүчүлөр аскер кызматкерлери деп эсептелет, мындан улам алардын айлыгынан төлөмдөр үчүн акча кармалбайт. Бул сумманын ичине айлык акы менен кошумча төлөмдөрдүн бардыгы кирет", — деп айтышты маалымат кызматтан.
Малыматка караганда, Аскер прокуратурасы Өрт өчүрүү кызматы акыркы үч жыл ичинде зыяндуу эмгек шарты үчүн алып келген каражатты мыйзамсыз берилген деп чечим чыгарган. Ага ылайык, ушул жылдын башында ар бир кызматкердин айлыгынан 20 пайыздан кармалып, мыйзамсыз берилди делген каражаттын ордун толтуруу аракети башталган.
