БИШКЕК, 1-мар. — Sputnik. Кыргызстандын эки жараны Вашингтондо мыйзамсыз курал-жарак сатууга жана аткезчиликке айыпталууда. Бул тууралуу Washington Post басылмасы жазып чыкты.
Маалыматка ылайык, 28 жаштагы Теңгиз Сыдыков менен 27 жаштагы Эльдар Резванов 27-февралда Вирджиния штатында колго түшкөн.
Washington Post басылмасынын жазышынча, аталган иштин соту шейшемби күнү, 27-февралда болмок, бирок аймактык соттун чечими менен 1-мартка жылдырылган. Кармалгандар 20 жылга чейин кесилиши ыктымал.
Ал эми Кыргызстандын Тышкы иштер министрлиги маалыматты тактап жатканын айтты.
Буга чейин Казакстандын дагы атайын органдары операция өткөрүп, кылмыштуу топтун мүчөлөрүн кармаган. Алардын арасында Кыргызстандын Жогорку Кеңешинин депутаты Дамирбек Асылбек уулу дагы бар болчу. Ал трансулуттук кылмыштуу топту жетектеген деп айыпталууда.
