БИШКЕК, 21-фев. — Sputnik. Жогорку Кеңеш 2018-жылдын 10-январында жалпы билим берүү уюмдарында жеткиликтүү окуу жүктɵмүнүн чегин эске алуу менен беш күндүк окуу жумалыгы белгиленген "Билим берүү тууралуу" мыйзамына киргизилген өзгөртүүлөрдү кабыл алган. Ал эми 21-февраль күнү ага президент Сооронбай Жээнбеков кол койду.
Билим берүү жана илим министрлиги жаңы майзам боюнча түшүндүрмө берип, жаңы стандартка мектептердин баары эле кире бербей турганын белгиледи. Маалыматта мамлекеттик билим берүү стандарты окуу жүктөмүнүн чеги башталгыч кластта 20 саат, негизги класстарда 26-32 саат экени айтылат.
"Министрлик 2016-жылы эле 1-4-класстар жана окуу жүктөмү аптасына 30 сааттан ашпаган негизги класстар үчүн беш күндүк окуу тартибин киргизип, стандартты өзгөрткөн. Ал эми жумасына 30 сааттан ашык билим алган окуучулар алты күн окушат", — деп айтылат билдирүүдө.
"9-класстын окуу жүктөмү 32 саат болгондуктан алты күн окуп жатышат. Алар менен бирге гимназия, лицейлер да жумасына бир гана күн эс алат", — дешти министрликтен.
Ведомство аптасына окуу жүктөмү 30 сааттан ашпаган бардык класстар беш күндүк окуу тартибине өтө ала турганын белгиледи.
"Окуу күндөрүнүн кыскарышы базистик окуу планы менен каралган жалпы окуу жүктөмүнө да, мугалимдердин айлык акысына да таасир этпейт. Окуучулар да учурдагы стандарт жана программа менен билим алууну улантышат", — деп айтылат маалыматта.
Ушу тапта Билим берүү жана илим министрлиги мектеп окуучуларына окуу жүктөмүн жакшыртуучу базистик окуу планын даярдап жатат. Ал алгач Кыргызстандын бир катар мектептеринде сыналып, андан кийин жапырт колдонулмакчы. Мында базистик окуу пландагы сааттардын саны кыскарбастан, билим берүүнүн мазмунун жана базистик пландын структурасын өзгөртүүгө басым жасалат.
