БИШКЕК, 19-фев. — Sputnik. Мамлекеттик каттоо кызматы анын курамындагы ишкана менен бөлүмдөрдөгү иштен алуулар коррупциялык системалардан, кызматтык көрсөтүүдө одоно мыйзам бузуулардан улам болду. Бул туурасында аталган ведомствонун маалымат катчысы Мелис Эржигитов Sputnik Кыргызстан маалымат кызматына билдирди.
"Бул — кызматтык иликтөөнүн жыйынтыгы. Калкты тейлөөдө процедуралык маселелер сакталган эмес, коррупциялык системалар да бар. Андан сырткары, кызмат көрсөтүүдө мыйзамдар одоно бузулган. Документтер өз учурунда берилбей, кармалып, кечиккен. Кызматтык иликтөө элден түшкөн арыздарды негизинде жасалды", — деди Эржигитов.
Ал иликтөөлөргө жалпыга маалымдоо каражаттарына чыккан маалыматтар да негиз болгондугун кошумчалап, Мамлекеттик каттоо кызматы өз чарасын көрүп, андан соң материалдар Башкы прокуратурага өткөрүлгөндүгүн айтты.
Эске сала кетсек, Мамлекеттик каттоо кызматынын жер-жерлердеги бөлүмдөрүнөн эки аткаминер жумуштан алынып, дагы бир канчасы дисциплинардык жазага тартылган. Алардын ичинде "Кыргыз почтасы" жана калкты паспорт менен камсыз кылууга түздөн-түз тиешеси бар "Инфоком" ишканасынын кызматкерлери да бар.
Ал эми Мамлекеттик каттоо кызматынын жетекчиси Дастан Догоев 14-февраль күнү өз каалоосу менен кызматтан кетүү боюнча арызын жазып, мындай чечимин жеке шарттарына байланыштуу деп түшүндүргөн.
