БИШКЕК, 16-фев. — Sputnik. Кыргызстанда желим баштыктарды импорттоо, өндүрүү жана сатууга тыюу сала турган мыйзам долбоору коомдук талкууга коюлду. Аны Айлана-чөйрөнү коргоо жана токой чарбасы мамлекеттик агенттиги иштеп чыкты.
Ведомстводон билдиришкендей, бул баштыктар экологияга терс таасирин тийгизип жатат. Өзгөчө Ысык-Көлдүн тегерегин булгап жатканы айтылды.
"Желим баштыктар дээрлик чирибейт. Аны өрттөгөндө бөлүнүп чыккан диоксин жана фуран заттары абада көпкө сакталат. Ал эми Стокгольм конвенциясында аталган заттар айлана-чөйрөгө жана адамдын ден соолугуна зыяндуу экени жазылган", — деп түшүндүрүштү агенттиктен.
Документтин авторлору желим баштыктарды өндүрүп жана сатып жаткан жеке тараптарга 500-1000 сом, юридикалык жактарга — 1000-2000 сом айып салууну сунуштап жатат.
Эске салсак, Мамэкотехинспекция өткөн жумада желим жана башка зыяндуу заттарды жаккан мончолорду текшерип чыккан. Маалыматка ылайык, айрым мончолор желим жана синтетикалык материалдарды — тигүү цехтеринен чыккан калдыктар, желим бөтөлкө, дөңгөлөк жана эски бут кийимдерди жагып, экологияга зыян келтирүүдө.
