БИШКЕК, 9-фев. — Sputnik. Мамлекеттик экотехинспекциянын инспекторлору Бишкек шаарындагы жеке мончолорду текшерүүгө алды. Бул тууралуу аталган мекеме билдирди.
Маалыматка ылайык, айрым мончолор желим жана синтетикалык материалдарды — тигүү цехтеринен чыккан калдыктар, желим бөтөлкө, дөңгөлөк жана эски бут кийимдерди жагып, экологияга зыян келтиришүүдө.
"Мамэкотехинспекциянын экологдору мончолор абаны канчалык денгээлде булгап жатканын аныктоо үчүн Айлана-чөйрөнү коргоо агенттигинин кызматкерлери менен биргеликте Бишкектеги жеке мончолордун чыпкаларынан атайын үлгүлөрдү алышууда. Ошондой эле мончолордун чыпкаларынын техникалык абалы текшерилип жатат", — деп айтылат маалыматта.
Инспекторлордун текшерүүсүнүн негизинде жана лабораториянын берген корутундусунун жыйынтыгы менен абаны булгап жаткандарга мыйзам чегинде чара көрүлөт.
Эске сала кетсек, Мамэкотехинспекция тарабынан жеке мончолордун чыпкаларын техникалык талаптарга дал келтирүү боюнча бир нече эскертүүлөр берилген. Андыктан көзөмөлдөнгөн тараптар иретке келтирилмейинче текшерүү улантылат.
Бишкек жылуулук борборунан чыккан түтүн кандай жол менен чыпкаланары бул жакта.
