MegaCom операторуна кызыккан "АКА Инвест" оюнан кайттыбы

БИШКЕК, 8-фев. — Sputnik. MegaCom бренди менен таанымал "Альфа Телеком" ЖЧКсын сатып алууга сунушун берген "АКА Инвест" компаниясы Мамлекеттик мүлктү башкаруу фондуна компанияны сатып алууга даяр экенин билдирип расмий түрдө кайрыла элек. Бул тууралуу Sputnik Кыргызстан агенттигине аталган ведомствонун жетекчисинин орун басары Адилет Бекбоев билдирди.

Белгилей кетсек, үстүбүздөгү жылдын январь айында жаратылыш минералдарын жана тоо тектерин казуу менен алектенген "АКА минералз энд майнинг" ЖЧКсы MegaCom компаниясын сатып алууга кызыкдар экенин билдирген. 19-январда ушул эле компания Кыргызстандын Юстиция министрлигинен "АКА Инвест" деген аталыш менен кайрадан каттоодон өтүп, өзүнүн иш багытын "маалыматтык технология жана эсептөөчү техника тармагы" деп өзгөртүп койгон. Кен тармагынан заматта байланыш сферасына секирген ишкана коомчулуктун сынына кабылган.

"АКА Инвестти" кыргызстандык Касым Курбанов менен Германияда каттодон өткөн "АКА Петролеум" ишканасы түптөгөн. Бул ишкана буга чейин IT-тармагында бир да жолу иш алып барып көргөн эмес.

Адилет Бекбоевдин айтымында, "АКА Инвест" MegaCom компаниясынын презентациясынан жалпы маалымат алганы менен аларга коммерциялык ички чарба тууралуу толук маалымат бериле элек.

"Бул компания MegaCom операторун сатып алууга кызыкдарлыгын гана айткан. Бирок бул нерсе сатып алууга даяр дегенди билдирбейт. "Баланча сумма сунуштай алабыз" деп да ооз ачкан эмес", — деди Бекбоев.

Ал ошондой эле аталган компания "Альфа Телеком" тууралуу толук маалымат алгандан кийин гана өз баасын атай ала турганын кошумчалады.

"Кайсы инвестор болбосун компания тууралуу маалыматы жок туруп айткан баага макул боло калбайт. Ошол себептен алар MegaCom компаниясы менен келишим түзүп анын негизинде презентация аркылуу компания менен таанышат. Анан өздөрүнчө иликтеп бүткөндөн кийин гана "ушул компанияны сатып алгыбыз келип жатат" деп бизге расмий түрдө кайрылышат. Учурда андай боло элек", — деди ал.

Бекбоев Мамлекеттик мүлк фонду "АКА Инвест" мурда IT-тармагында иштеп көргөнбү, эмне болгон компания, ишенсе болобу деген суроолорго жооп алуу үчүн Юстиция министрлигине кайрылып, бирок жооп ала электигин белгиледи.

"АКА Инвест" расмий кат менен бизге кайрылып калса, бул компаниянын таржымалы биздин атайын бөлүм тарабынан текшерилет. Күмөндүү жагдайлар болсо укук коргоо органдары менен биргеликте иликтенет. Бардыгы жайында болгондо гана MegaCom компаниясынын ички чарбасы менен таанышууга мүмкүнчүлүк алышат", — деди Бекбоев.

Ал эми "Альфа Телеком" жоопкерчилиги чектелген коомунун маалымат кызматы "АКА Инвест" компаниясына презентация өтүлгөнүн тастыктады.

"Өткөн аптада аталган компаниянын өкүлдөрү биздин ишканага келишкен. Аларга MegaCom операторун тааныштырган презентация өтүлдү. Бирок компаниянын ички чарбасынын сырын ачкан маалыматтар берилген жок", — деп маалымат кызматынан ырасташты.

Алар ошондой эле презентацияга "АКА Инвест" компаниясынын өкүлдөрү менен кошо анын жетекчиси Касым Курбанов келгенин билдиришти.

Sputnik Кыргызстан маалымат агентти "Альфа Телеком" ЖЧКсынын 100 пайыз акциясын сатып алууга берилген сунуш бүгүнкү күндө канчалык деңгээлде күчүндө экенин билүү максатында Касым Курбанов менен байланышты. Бирок ал бул боюнча азырынча эч кандай маалымат бере албастыгын айтып, комментарий берүүдөн баш тартты.

Бул арада MegaCom операторун сатып алууга швейцариялык компаниядан сунуш келип түштү. Sputnik Кыргызстан агенттигинин журналисттери ал эмне болгон компания экенин иликтөөгө жетишти. Кызыгы сунуш берген ALF Consulting SA ишканасынын жетекчиси бир нече ысымдуу экени аныкталды.