БИШКЕК, 2-фев. — Sputnik. Чүй облусунун Москва райондук соту Темир Жумакадыров менен дагы эки кишинин өмүрүн алган кырсыкка себепкер айдоочу Таалайбек уулу Автандилди 10 жылга эркинен ажыратып, мамлекетке 2,1 миллион сом айып төлөтүү чечимин чыгарды. Өкүмгө ылайык, айыпкер жазасын турак колониясында өтөйт. Бул тууралуу сот залынан Sputnik Кыргызстан агенттигинин кабарчысы билдирди.
Эске салсак, Москва районуна караштуу Садовое айылынын аймагында "КамАЗ" менен Land Cruiser кагышып, вице-премьер Темир Жумакадыров, жардамчысы Нурлан Жамгырчиев жана айдоочусу Нурбек Муканов каза болгон.
Милиция кийинчерээк жол кырсыгы кандайча болгондугун алгачкы маалыматтарында айтып берген. Жүк ташуучу автоунаанын алдына машина токтоп, андан качам же озуп өтөм деген КамАЗдын айдоочусу жолтандабас менен кагышып, аны 50 метрдей сүйрөп барып, жол жээгинде турган зым карагайды сүзүп, жолдон чыгып кеткен.
