БИШКЕК, 31-янв. — Sputnik. Кыргыз-өзбек чек арасында ок жеген кыргызстандык жаран кыргыз тарапка өткөрүлдү. Бул тууралуу Чек ара кызматы кабарлады.
Билдирүүгө ылайык, Асан Усенбаев 31-январь күнү "Достук-автодорожный" өткөрүү пунктунда кыргызстандык чек арачыларга өткөрүлүп, андан соң Ош облустук ооруканасына жеткирилген.
"Өзбекстандык чек арачылардан ок жеген жаранды өткөрүп алууга укук коргоо органдары, медицина кызматкерлери, жергиликтүү бийлик өкүлдөрү жана туугандары барган. Учурда Асан Усенбаевдин абалы канааттандыраарлык", — деп айтылат маалыматта.
Аталган факты боюнча эки тараптан тең иликтөө иштери жүргүзүлөт. Андан соң мындай окуяларды болтурбоо максатында атайын иш-чараларды көрүү пландалууда.
Эске сала кетсек, Жалал-Абад облусунун Ала-Бука районунун аймагында 27-январда өзбекстандык чек арачылар курал колдонуп, кыргызстандык жаранга ок чыгарган, санынан жаракат алган ал киши Өзбекстандын аймагындагы ооруканага жеткирилген.
