БИШКЕК, 29-янв. — Sputnik. Жалал-Абад облусунун Ала-Бука районунун аймагында 27-январда өзбекстандык чек арачылар курал колдонуп, кыргызстандык жаранга ок чыгарган, санынан жаракат алган ал киши учурда коңшу Өзбекстандын аймагындагы ооруканада жатат. Бул тууралуу Кыргызстандын Чек ара кызматынан маалымат кызматынан кабарлашты.
Маалыматта 39 жаштагы адам мал жайып жүрүп, байкоосуздан Өзбекстандын чек арасына кирип кеткендиги кабарланган. Ал коңшу өлкөнүн чек арачыларынын "токто" деген талабын укканда качып баратып ок жегени айтылды.
Кыргызстандын Чек ара кызматы Өзбекстандын кесиптештери менен сүйлөшүүлөрдү жүргүзгөнү жана ала-букалык жаранды иликтөөө иштери бүткөндөн соң жана ал жакшы болуп калгандан кийин мекенине өткөрүп берүү чечими кабыл алынганын кабарлады. Андан сырткары, эки тарап тең бул боюнча өз алдынча иликтөө жүргүзмөй болгон.
Кыргызстандын Чек ара кызматы окуя боюнча Өзбекстан тараптын келтирген жүйөсүн таратты.
"Чек араны бузуп өтүп кеткен кыргыз жаран өзбекстандык чек арачылардын кыйкырып токтотууга кылган аракетин укпай, качып чыгып кетүүгө аракет кылган. Айлана караңгы болуп калганыктан, чек арачылар анын жай жаран экендигин аныктай албай, акыры ок чыгарган", — деп айтылат маалыматта.
Мунун кесепетинен көк-серектик 39 жаштагы киши сол бутунан сан жагынан жаракат алган.
Маалыматта ок жеген кыргызстандык Өзбекстандын Наманган облусунун Чуст районундагы ооруканага жеткирилген. Анын абалы боюнча маалыматтарда "канааттандырарлык" деп айтылган.
"Эки тараптуу сүйлөшүүлөрдөн кийин жарадар болгон адамдын туугандарына Чуст районундагы ооруканага каттап турууга мүмкүнчүлүк түзүлдү", — деп айтылган маалыматта.
Sputnik Кыргызстан жергиликтүү жашоочулар жана Көк-Серек айыл өкмөтүнүн өкүлдөрү менен байланышып, окуянын чоо жайын сурады.
Чек ара кызматынан Көк-Серек айыл өкмөтүнүн аймагынын жашоочуларына чек арага кирип-чыгуу тартиптери, коопсуздукту сактоо боюнча түшүндүрүү иштери жүргүзүлгөндүгүн кошумча билдиришти.
