БИШКЕК, 26-янв. — Sputnik. Өзгөчө кырдаалдар министрлиги кышында электр энергиясы, меш, отун көп колдонулгандыктан өрт чыгып кетүү кооптуулугу бар экенин эскертет.
Мындан улам ведомство кырсыкты алдын алуу үчүн коопсуздук эрежелерин сунуштады.
— Имараттын күйүүчү бөлүктөрүнүн кесилишинде (пол, дубал, шыб ж.б.), меш жана мештин морлорунун ортосунун ички бетинде 38 сантиметрлик күйбөй турган материал болушу керек;
— Үйгө меш орнотууда тийиштүү күбөлүгү бар усталарды чакыруу керек;
— Меш менен морлорду өз убагында текшерип туруу зарыл. Ар бир эки айдын ичинде жок дегенде мештин морлорун тазалап туруңуз;
— Мешти ашыкча ысытып анын жанына эмеректерди, башка күйүүчү заттарды коюуга болбойт;
— Газ менен күйүүчү мештерди колдонууда коопсуздук инструкциясына көңүл буруңуздар;
— Ашканадагы газ плиталарды, күйүп турган мештерди, электр приборлорду кароосуз калтырууга, балдарды жалгыз таштоого болбойт;
— Күйүп турган примустарды жана керогаздарды үйдүн жыгач менен капталган тумбаларына, кампаларга жана сарайларга орнотууга болбойт;
— Электр чубалгыларынын эскирген бөлүгүн өз убагында алмаштыруу;
— Колго жасалган электр коргогучтарын албастан заводдон даярдалгандарын гана колдонуңуздар;
— Электр жылыткычтарды (үтүк, мискей, плита) күйбөй турган койгучтарга орнотуу зарыл;
— Үйдүн шыбына, жер төлөгө, кампаларда жана сарайларда тамеки тартууга жол берилбейт. Ошондой эле жарык берүүгө ачык шамдарды колдонуу кооптуу. Баарынан фонарик ыңгайлуу;
— Тоңуп калган сууну, канализацияны, жылытуучу түтүктөрдү ачык от менен эмес, ысык суу менен эритүү зарыл;
— Үйдүн шыбы менен жер төлөгө күйүүчү материалдарды жана таштандыларды сактоого болбойт;
— Короонун аймагы ар дайым таза болушу керек;
— Бузук электр орнотмолорун (розетка, вилка, өчүргүч) колдонбогула;
— Колго жасалган жылытуучу электр приборлорунан баш тарткан туура.
