БИШКЕК, 26-янв. — Sputnik. Кыргызгидромет дем алыш күндөргө аба ырайынын божомолун жарыялады.
27-29-январда Чүй, Талас өрөөндөрүндө түнкүсүн 20…25 градус, күндүз 13…18 градус суук, Чүй облусунун түндүгүндө түнкүсүн 25…30 градус, күндүз 15…20 градуска чейин ызгаар болот.
Ош, Жалал-Абад, Баткен облустарынын өрөөндөрүндө түнкүсүн 11…16 градус, күндүз 2…7 градус суук, Ысык-Көл ойдуңунда түнкүсүн 17…22, күндүз 4…9 градуска чейин төмөндөйт. Ал эми тоо этектеринде түнкүсүн 23…28 градус, күндүз 13…18 градус суук болот.
Суусамыр өрөөнүндө түнкүсүн 40…45 градус, күндүз 28…33 градуска чейин суук болот.
Мындай суук аба ырайы жайыттарда малды кармоону, автоунаа, энергетика жана коммуналдык кызматтардын ишин кыйындатат. Абанын температурасынын кескин төмөндөшү жана кардын аз болушу күздүк дан эгиндерине кооптуу, ошондой эле жемиш бактардын жана жер-жемиштердин тоңушуна алып келет.
26-январдан 28-январына чейин жаап өткөн жана күтүлүп жаткан жаан-чачынга байланыштуу Кыргызстандын тоолуу райондорунда, Мырзаке — Кара-Кулжа — Алайкуу автоунаа жолунун Тамчы участагындагы 74-76-78-чакырымдарында кар көчкү түшүүcү мүмкүн. Унаалардын ортосундагы 500 метр аралык кыймыл сактылышы зарылдыгын эскертилет.
Мындай суукта үшүп калбасын деп шаар көчөлөрүн тазалагандарга ысык чай уюштурулду.
