БИШКЕК, 18-янв. — Sputnik. Түндүк Корея менен Түштүк Кореянын спорттук командалары Пхёнчхан шаарында өтө турган Олимпиаданын ачылыш аземинде бир туунун алдында чыгышат. Бул тууралуу РИА Новости агенттиги жазды.
Көгүлтүр түс менен Корея жарым аралынын сүрөтү тартылган ак желектин алдында чогуу баскан эки өлкөнүн спортчулары улуттун биригүүгө болгон умтулуусун көрсөтөт.
Маалыматта айтылгандай, Олимпиадага катыша турган кыз-келиндердин хоккей командасы эки Кореянын спортчуларынан куралат. Алар машыгууларын Түндүк Кореянын Масикрён лыжа базасында өткөрүшмөкчү.
Дүйнөлүк иш-чарага Түндүк Кореядан 150 спортчу келет. Булардан тышкары, 230 күйөрман жана журналисттер барат. Ошондой эле ачылыш аземинде түндүк кореялык тхэквондочулар өз өнөрлөрүн көрсөтмөкчү.
