БИШКЕК, 6-янв. — Sputnik. Оор салмактагы кыргызстандык мушкер Тилек Жээнбеков менен украиналык Юрий Проценко WEF Global 11 турниринде беттешет. Бул тууралуу аталган федерациянын президенти Руслан Кыдырмышев билдирди.
Беттеш 25-февралда WEF Global 11 турниринин алкагында борбордогу Кожомкул атындагы спорт сарайында өтөт. Анда эки мушкер кеченин башкы беттешинде чемпиондук кур үчүн ат салышат.
Кыдырмышевдин айтымында, Жээнбеков WEF федерациясынан украиналык Юрий Проценко менен беттеш уюштуруп берүүсүн суранган.
Жээнбековдун өзү менен байланышканыбызда Проценко менен оор салмактагы мушкерлердин намысы үчүн беттешип жаткандыгын айтты.
"Баарыңар эле билсеңер керек, бир ай мурда украиналык Юрий Проценко Кыргызстанга келип биздин мушкерибиз Мыктыбек Мамасалиевди жеңип кетти. Жеке мен үчүн Кыргызстандагы оор салмактагы мушкерлердин утулганы катуу тиет. Анын үстүнө өзүмдүн салмагымдагы атаандаш таппай кыйналам. Өзбекстандык мушкер Мурод Хантураевди бир нече жолу беттешке чакырсам келбей койгон. Проценко экөөбүздүн салмагыбыз бир, бирок менин боюм узун. WEF уюмунун өкүлдөрү менен беттеш тууралуу сүйлөшүүлөр жүргөн. Атаандашым биздин сунушту кабыл алды, эми жакшылап даярданышым керек", — деди Жээнбеков.
28 жаштагы Тилек Жээнбеков Кыргызстандагы оор салмактагы белгилүү мушкер. Анын бою 197 сантиметр болсо, салмагы 115 килограмм. Панкратион оюндары, самбо боюнча Евразиянын, грэпплинг боюнча Азиянын чемпиону. ММА бир нече эл аралык турнирлердин жеңүүчүсү. Fighter KG клубунун мүчөсү. Машыктыруучулары — Кенжебек Чекиров жана Акжол Ажибеков.
