БИШКЕК, 5-янв. — Sputnik. Кыргызстандык ММА мушкери Бусурманкул Абдубаит уулу кезектеги беттешин өткөрөт. Бул тууралуу спортчунун машыктыруучусу Кенжебек Чекиров билдирди.
Беттеш М-1 Global Ghallenge 88 турниринин алкагында 22-февралда Москва шаарындагы олимпиадалык спорт комплексте өтөт. Анда Бусурманкул Абдубаит уулу аталган уюмдун мурдагы чемпиону Максим Дивнич менен күч сынашат.
Эске сала кетсек, Абдубаит уулу М-1 Global спорттук уюму менен эки жылга келишим түзгөн. Бул спортчунун биринчи беттеши болмокчу.
Абдубаит уулу Бусурманкул 1993-жылы Ош облусунун Чоң-Алай районунда туулган. Спортто "Алай" каймана аты менен белгилүү.
2011-жылы "FIGHTER KG" спорттук клубуна келип, машыктыруучу Кенжебек Чекировдун колунда тарбиялана баштаган. Дүйнөдөгү бардык спортчулардын рейтингин аныктаган Sherdog порталындагы көрсөткүчү боюнча тогуз жолу профессионалдуу беттеште утуп, эки ирет жеңилүү ызасын тарткан.
