БИШКЕК, 28-дек. — Sputnik. Таксинин Токмоктогу "Бурана" комплексинин жанынан сабалган айдоочусу ооруканадан каза тапты. Милиция саламаттыкка атайылап оор залал келтирүү беренеси менен кылмыш ишин козгогонун Чүй облустук милициясынын маалымат кызматы билдирди.
Тергөөнүн жүрүшүндө бир таксист таанышы менен Чүй айылына кардар алуу үчүн барганы аныкталган. Дарекке келген маалда "Бурананын" жанында турган балдардын тобу алгач аларды опузалап, андан соң кол салышкан. Айдоочу жардамга чакырган кнопканы басууга үлгүрүп, жолдошу менен кетип калган.
"Көмөккө келген дагы бир таксист жалгыз болуп калган. Катуу ур-токмокко алынган 37 жаштагы айдоочу ооруканада көз жумду", — деп айтылат маалыматта.
Райондук милициянын тергөө бөлүмү Кылмыш жаза кодексинин "Өлүмгө дуушар кылган оор залал келтирүү" беренеси менен кылмыш ишин козгоду. Иликтөө иштеринин натыйжасында кылмышка шектелип 22 жаштагы жергиликтүү тургун кармалды.
