БАЛЫКЧЫ, 26-дек. — Sputnik. Балыкчыда өспүрүмдөр кылмыштуулугунун алдын алуу максатында 22-декабрдан 28-декабрга чейин "Түндөгү өспүрүм" аттуу рейд жүрүүдө. Бул тууралуу аймактык кабарчы билдирди.
Ага ылайык, иш-чара Балыкчы шаардык мэриясы, билим берүү бөлүмү жана ата-энелер менен биргеликте өткөрүлүп жатат.
Өспүрүмдөр менен иштөө инспекциясынын ага инспектору, милициянын подполковниги Элмира Касмалиева рейддин максаты түн ичинде коомдук жайларда жүргөн балдарды аныктоо экенин айтат.
"Эгерде балдар түндө жүрө турган болсо бир гана ата-энелеринин же 18 жаштан өткөн байке-эжелеринин коштоосунда болуусу керек. Каттоодо турган өспүрүмдөрдү түндө үйлөрүнө барып текшеребиз", — деди Касмалиева.
Ал ошондой эле рейд учурунда ата-энелер, инспекторлор менен биргеликте үч өспүрүм интернет клубда жүргөн жеринен кармалганын кошумчалады. Балдардын Ысык-Көл районунун Тору-Айгыр айылынан келип ойноп жаткандыгы аныкталган.
Өспүрүмдөр туугандарына өткөрүлүп, мыйзамдын негизинде эскертүү берилген.
