БИШКЕК, 17-дек. — Sputnik. Астанада бүгүн кыргыз-казак мамлекеттик чек араларын демаркациялоо жана эки тараптуу чек аралардын режими боюнча келишимге кол коюлду. Бул туурасында өлкө башчы Сооронбай Жээнбеков Астанада журналисттерге айтканын президенттин маалымат кызматынан билдиришти.
Эскерте кетсек, Жээнбеков бүгүн Казакстанга расмий сапар менен барды.
“Биз бүгүн тарыхый документке — кыргыз-казак мамлекеттик чек араларын демаркациялоо жана эки тараптуу чек аралардын режими боюнча келишимге кол койдук. Ошентип эки өлкөнүн ортосундагы мамлекеттик чек араларынын юридикалык жактан катталышын аяктадык”, — деди Жээнбеков.
КР башчысы мындай келишим эки тараптын мындан аркы коңшулук мамилелерин жана өз ара пайдалуу кызматташтыгын чыңдайт деген ишенимин билдирген.
“Эми биз чек аралар ортосундагы формалдуулуктан качып, элдин мурдагысындай, эки тарапка тоскоолдуксуз өтүүсүнө биргелешип аракет кылып, умтулуубуз керек. Бир биз тууган калкпыз. Кыргыз менен казактан жакын эл жок”, — деген Жээнбеков.
Мамлекет башчысы, мындан сырткары, маанилүү делген маселелерди чечип алуу жаатында келишкенин айткан.
Ал эми Казакстандын башчысы Нурсултан Назарбаев такталбай, ачыкталбай калган маселелер жоктугун белгиледи.
“Биз жалпы тил таба албай калган чечимдер калган жок. Сооронбай Жээнбеков менен Минскидеги жолугушуулардан бери көп мезгил өтө элек, бирок фитосанитария, ветеринария, транспорт, салык жана бажы көзөмөлү жаатында бир топ иштер жасалды. Эки өлкөнүн ортосундагы товардын айлануусу 19 пайызга өстү. Болгон мүмкүнчүлүктөрдү пайдаланып, 2020-жылы муну 1 миллиард долларга жеткиришибиз керек”, — деди Назарбаев.
Мындан сырткары, ал инвестиция, суу энергетикасы, аймактык-саясий, маданий-гуманитардык суроолорго токтолуп, коопсуздук жана санарип боюнча биргелешкен долбоорлорду ишке ашырууну айткан.
"Мен Сооронбай Шариповичтин иш сапарынын жыйынтыгына толук канааттанганымды билдирем. Бир тууган кыргыз эли менен болгон мамилеге өзгөчө маани беребиз”, — деген Назарбаев.
Ал эми Жээнбеков Назарбаевди 2018-жылы сентябрь айында боло турган Дүйнөлүк көчмөндөрдүн III оюндарына жана жазуучу Чыңгыз Айтматовдун 90 жылдык мааракесине чакырды.
