БИШКЕК, 25-дек. — Sputnik. Өзбекстан 2018-жылы Кыргызстанда Ravon жеңил унаасынын жана Isuzu автобустарынын төрт моделин чыгарууну пландап жатат. Бул тууралуу "ДжиЭм Өзбекстан" АКсынын өкүлү Жахонгир Тиллаев маалымат жыйында билдирди.
КРдин Инвестиция тартуу жана коргоо агенттигинин директору Эсенкул Момункуловдун айтымында, өлкөдө бир топ кызмат орундарын камсыз кыла турган унаа өндүрүшүн өнүктүрүү мамлекеттик саясаттын алдыңкы маселелеринин бири.
Өзбек тараптан билдиришкендей, алгач Ravon үлгүсүндөгү унааларды өндүрүү үчүн 50 кызмат орду ачылат.
"Жумушка техникалык окуу жайлардын студенттери жана бүтүрүүчүлөрү алынат", — деди Тиллаев.
Маалыматка караганда, Ош шаарында Ravon унааларын чогултчу аянт пайда болду. Бишкек шаарында баасы 38 миңден 77 миң долларга чейинки Isuzu автобустарды чыгара турган завод ачылмакчы. Ал эми Кара-Балтада айыл чарба шаймандарын чогултуу пландалып жатат.
Бул заводдордо чыгарылган товарлар Кыргызстандын жана ЕАЭБ өлкөлөрүнүн аймыганда сатылат.
