БИШКЕК, 22-дек. — Sputnik. Ак-Талаа районундагы Кара-Бүргөн айылынын Мукаш Базаркулов атындагы орто мектебинде сегиз окуучу сарык оорусуна кабылды. Бул маалыматты Sputnik Кыргызстан агенттигинин кабарчысына райондук билим берүү бөлүмүнүн жетекчиси Каныбек Эсеналиев тастыктады.
Буга чейин редакцияга окурман кайрылып, аталган айылда бир нече мектеп окуучусу сарык болгонун билдирген.
"Бул мектепте сентябрь айынан бери сегиз окуучу Гепатит А илдетине чалдыкты. Өзүбүздүн иликтөөлөргө караганда, алгач мектеп курагына жете элек, бакчага барбаган бала ооруй баштаган. Андан бир көчөдө жашаган балдарга жугуптур. Сенбярь айынан бери жети окуучу ооруканага жатып дарыланып чыгышты. Учурда 5-класстын окуучусу бейтапканада", — деди Эсеналиев.
Анын айтымында, бул окуялар мектептеги окуу процессин үзгүлтүккө учураткан жок.
"Биринчи бала ооругандан бери эле мектеп тыкыр көзөмөлдө, медиктер окуучуларды улам-улам текшерип жатышат. Район аймагындагы башка 18 мектеп азырынча тынч", — деп кошумчалады жетекчи.
"Бизге балдар ооруй баштаганы тууралуу маалымат түшөөрү менен жерине бардык. Мектепте бир айдан бери аристон иштебей туруптур. Ооруган балдардын тамактанган идиш-аягын башкалардыкына аралаштырып жууп, бирге сакташчу экен. Мектеп жетекчилигине административдик айып салынып, кемчилигин оңдоо тапшырмасы берилди", — деди дарыгер-эпидемиолог Эрлан Бекишов.
Ал эми Ак-Талаа райондук үй-бүлөлүк дарыгерлер борборунун директору Айгүл Капарованын айтымында, учурда ооруканада дарыланып жаткан окуучу дагы деле инкубациялык этапта.
"Ооруну алдын алуу үчүн мектепте жана ооруган балдардын үйүндө хлорамин каражаты менен атайын процедуралар жүргүзүлүп жатат. Окуучулардын мугалимдери, үй-бүлөсү, классташтары толук текшерилди. Азырынча эч кимисинен сарык табылган жок", — деди Капарова.
Саламаттыкты сактоо министрлигинен өлкөнүн башка аймактарында абал тынч экенин айтышты.
Маалыматка караганда, былтыркы 11 ай ичинде сарыкка 14 жашка чейинки 10853 бала кабылса, быйыл 6128 учур белгилүү болду. Оорулуу балдардын көпчүлүгү Баткен, Ош облустарында жана Ош шаарында жашашат.
