Боронов: 24 адам өлгөн Аюу айылынын тургундары дагы деле көчпөй жатышат
24 адам өлгөн Өзгөндүн Аюу айылынын тургундары дагы деле көчпөй жатышкандыгын Кубатбек Боронов Sputnik Кыргызстан радиосуна маек куруп жатып билдирди.
Эскерте кетсек, аталган аймакта 29-апрелде жер көчүп, алты үй-бүлөдөн 24 кишини басып калган.
"Шарт түзүп, акчасын берсе да коопсуз жайларга көчүп барбай жүргөн жарандарыбыз бар. 24 адам жер көчкү алдында калган Өзгөндүн Аюу айылындагы 40ка чукул үй-бүлөгө башка жер берип, шарт түзүп берсе да кайра эле баягы жеринде жашап жатышат. Ал жерде көчкү жүрүү коркунучу күч", — деди Боронов.
Ал жарандардын үйүн түрттүрүп салуу мыйзамсыз болгондуктан ӨКМ мындай кадамга бара албай тургандыгын кошумчалады.
