АКШнын Коргонуу министрлиги (Пентагон) америкалык аскерлер НЛОну бутага алган видеону жарыялаганын британиялык The Independent басылмасы жазып чыкты.
Маалыматка караганда, видео үч жыл мурда, 2014-жылы тартылган. Сан-Диего тарапта (Тынч океандын Мексикага жакын жээгинде) машыгып жүргөн сокку уруучу учактын экипажына НЛОну кармоо тапшырмасы түшкөн.
"НЛО биздин бардык борттордон дагы ылдам учту", — деп учактын командири Дэвид Фрэвор the Herald басылмасына билдирген.
Учкучтун айтымында, объекттин ылдамдыгы аскер учагынын радарларын иштен чыгарып койгон.
Бир аз мурда Пентагон НЛОлорду изилдөө менен алектенип, бул максатта 2007-2012-жылдар аралыгында 22 миллион доллар сарптаганын билдирген.
