Конкурстарга катышуу ырчыга популярдуулук деле алып келбейт. Мындай оюн белгилуу эстрада жылдызы Омар Sputnik Кыргызстан радиосуна берген маегинде билдирди.
Анын айтымында, эч кандай конкурска катышпай деле атактуу болгон ырчылар бар.
"Конкурска баруу ырчыны популярдуу деле кылбайт. Мисалы, кыргыз эстрадасында элге таанылган, бирок бир да конкурска барып катышпаган Мирбек Атабеков, Нурлан Насип сыяктуу ырчылар бар. Булар жеке чыгармачылыгы менен гана алектенип, элге таанылып келет. Конкурска барып атак топтой албайсың. Бул артист үчүн мекен алдындагы милдетиңди аткаруу болуп саналат", — деди Омар.
Ал ошондой эле конкурска катышуу мурда ырчы үчүн жакшы жарнама болсо, интернеттин өнүгүүсү менен андай болбой калганын кошумчалады.
Эске сала кетсек, ырчы Омар Жанышов Казакстанда өткөн Silk Way Star эл аралык сынагында баш байгени багындырган.
