БИШКЕК, 16-дек. — Sputnik. Ырчы Омар Жанышов Казакстанда өткөн Silk Way Star эл аралык сынагында баш байгени багындырды. Бул тууралуу Sputnik Кыргызстан маалымат агенттигине ырчынын менеджери Миргүл Эсеналиева билдирди.
Анын айтымында, үч айга созулган музыкалык шоу жалпы 12 этаптан туруп, ар бирине ырчылар ар түрдүү тематикада даярданышкан.
"Эл аралык сынакка Кыргызстан, Казакстан, Азербайжан, Түркия, Грузия, Башкыртстан, Татарстан, Өзбекстан, Тажикстан өлкөлөрүнүн популярдуу ырчылары катышты. Ошондой эле ар бир өлкөдөн бирден калыстар тобунун мүчөсү шайланып, алардын арасында биздин мамлекеттен ырчы Гүлнур Сатылганова отурду", — деди Эсеналиева.
Эске салсак, Омар буга чейин Сочиде өткөн "Жаңы толкун — 2008" эл аралык жаш таланттар сынагынын лауреаты болуп, Алла Пугачеванын алтын жылдыз сыйлыгына татыган.
