БИШКЕК, 13-дек. — Sputnik. Бишкектеги көптөгөн кафе, клуб жана бизнес-борборлордун алдына унаа токтотууга тыюу салынганын Sputnik Кыргызстан агенттигине окурмандар WhatsApp-каналы аркылуу билдирди.
"Мен Тоголок Молдо менен Исанов көчөлөрүнүн ортосундагы Токтогул көчөсүндө жайгашкан жеке клиникага келгем, бирок унаа токтотууга орун калбай калыптыр. Жолдун каршы тилкесиндеги кафенин алды бош болгону менен кардарларга гана уруксат имиш. Күзөтчүлөр тосмо тактайларды коюп коюптур. Ал эми ооруканага унаасы менен келген бейтаптар машинасын кайда токтоторун билбей убара", — деди окурман.
Мэриянын жер ресурстары башкармалыгынын башкы адиси Кабыл Кыдырмышев бардык ишканалардын ээлери менен күзөтчүлөрү алардын кардары болбогон жарандарга унаа токтотууга тыюу салууга акысы жок экенин белгиледи.
"Бул боюнча арыз бизге мурда түшкөн эмес. Жарандар ишканалар унаа токтотууга акча талап кылып жатканын айтып арызданышкан. Мындан улам көйгөйдү чечкенбиз", — деди Кыдырмышев.
Ал ошондой эле кайсы бир мекеме тосмолорду орното турган болсо айып салынып, конструкцияны демонтаждоого буйрук берилерин кошумчалады.
