БИШКЕК, 11-дек. — Sputnik. Учурда Ош шаарындагы май алмаштыруучу жайдан чыккан өрттү тогуз бригада өчүрүп жатат. Акыркы өрт өчүрүүчүлөр коңшу Кара-Суу районунан алып келинди. Бул туурасында Spunik Кыргызстан маалымат агенттигине ӨКМдин Ош шаары боюнча башкармалыгын жетекчиси Нурлан Баймуратов билдирди.
“Маалымат бизге саат 20:15 чамасында келип түштү. Азыр кооптуулук жок. Тилсиз жоону “Кыргыз мунай” май бекетине жетпей өчүрүп калдык. Адам өмүрүнө зыян келген жок. Кырсыктын себеби аныкталууда”, — деди Баймуратов.
Анын айтымына караганда, азыр бул аймакта жайгашкан май алмаштыруучу үч жайдын ээси такталып жатат.
Учурда өрт чыккан жерде бир Тез жардам автоунаасы ар кандай кырдаалга даяр турат. Аталган май алмаштыруучу жай Ош-Кара-Суу жолунда жайгашкандыктан, шаардык милиция кызматкерлери жол кыймылын жөнгө салууда.
