БИШКЕК, 11-дек. — Sputnik. Борбор калаанын Жибек Жолу проспектиси менен Тоголок Молдо көчөлөрүнүн кесилишинде бир келинди жаш кызы менен унаа коюп кетип, айдоочусу из жашырып кеткени туурасында социалдык тармактын колдонуучусу жазган.
Мындан улам Sputnik Кыргызстан агенттигинин кабарчысы кырсыктан жабыркаган Мээрим Усупбаева менен байланышты. Анын айтымында, окуя кечээ, 10-декабрда, саат 13.00дөр чамасында болгон. Бирок алар ооруканага жана милицияга кайрыла элек.
"Эки кызым менен маршруткадан түшүп, жол чырак кызыл күйгөндө өтүп бара жатканда катуу келген унаа сүзүп, мен кулап түштүм. Артымды карасам 5 жашар кызымдын буту дөңгөлөктүн алдында туруптур. Анан улуу кызым машинаны артка айдатып бутун тартып алды. Бирок айдоочу унаасынан түшпөй качып кетти", — деди жабырлануучу.
Ошондой эле ал кечээ ооруканага барбаганын, окуя болгон учурда шок абалында болгондуктан Тез жардам чакыртпай кетип калышканын айтты. Бирок үйүнө баргандан кийин жамбашы жана башы ооруй баштаган. Ал эми кызы оор жаракат алган эмес. Усупбаева бүгүн Чүй облустук ооруканасына барып кароодон өтүп, андан соң милицияга арыз жаза турганын билдирди.
