БИШКЕК, 6-дек. — Sputnik. Кыргызстанга Казакстандан буудай алып келүүнүн саны өскөндүгүн Sputnik Кыргызстан агенттигине ун өндүрүүчүлөр комитетинин төрагасы Рустам Жунушев билдирди.
Казакстандан буудай темир жол аркылуу хоппер менен (атайын вагондор) алып келинет. Бирок учурда хоппер жетишпей жаткандыктан, акчасы төлөнгөн дандын 20-30 пайызы гана келип жатат.
Хопперлер түшүмү мол болгон Россияда иштеп жаткандыктан, буудай таңкыстыгы жаралышы мүмкүн деген божомолдор айтылган.
"Болжол менен 20-ноябрдан бери алып келинген буудайдын көлөмү эки эсеге өстү, бирок бул деле заказ кылынган дандын 50-60 гана пайызы. Азырынча буудай тартыштыгы боюнча көйгөй жок. Запас дагы 1-1,5 айга жетет", — деди Жунушев.
Буудай жеткирүүнүн көлөмү жогорулаганы мурда жүгү менен турган атайын вагондордун бошоп калышы менен байланыштуу болушу мүмкүн экендиги кошумчаланды.
