БИШКЕК, 4-дек. — Sputnik. Келерки жылы Кумар уулу Балыктын, Багыш уулу Сазандын, Ырысменде уулу Шапактын жана Өмүр уулу Чоюке манасчылардын юбилейлик мааракелери чоң салтанат менен белгиленет. Бул тууралуу президент Сооронбай Жээнбековдун Манас күнүнө карата жасаган кайрылуусунда айтылды.
Президенттин кайрылуусунда "Манас" эпосу кыргыз элинин кылымдар бою муундан муунга өтүп келген, руханий жашоосунун маңызын түзгөн көөнөрбөс дөөлөттөрүнүн туу чокусу, журттун сыймыгы экени айтылып, манасчылардын зор эмгегине токтолду.
"Нечен кылымдардын катаал элегинен өткөн элибиздин ыйык мурасын сактап, урпактарга жеткирүүдө манасчылар опол тоодой эмгек өтөгөн. Манасчыларыбыз кайталангыс өнөрү, Жараткан берген таланты менен тарыхыбызды жана бүгүнкү учурубузду бириктирген көпүрө болуп келишет", — деп айтылат кайрылууда.
Өлкө башчы "Манас" – байыркы элибиздин жашоо турмушунун, каада-салтынын, тарыхынын энциклопедиясы жана дүйнөлүк маданият казынасына кошкон эң зор салымы экенин кошумчалады.
Сөзүнүн соңунда өлкө башчы Айкөл Манас көп улуттуу кыргыз элинин достугунун жана биримдигинин символу болуп жүрсүн деген тилегин айтты.
