БИШКЕК, 4-дек. — Sputnik. Чүй облусунун Жайыл районундагы Кайгуул милициясынын кызматкери өз өмүрүн кыюуга аракет кылганын ИИМдин маалымат кызматы билдирди.
Ички иштер министрлиги маалымдагандай, буга чейин 26 жаштагы милиционерди белгисиз кишилер бычактап кетти деп ЖМКга чыккан маалыматтар чындыкка туура келбейт.
ИИМдин билдиришинче, 3-декабрда саат 20:00дөр чамасында Жайыл РИИБдин Кайгуул милициясынын кызматкери үйүндө өзүн өлтүрүүгө аракет кылган. Маалыматты жубайы тастыктаган. Окуя болгон жерден бычак табылган.
Жубайынын айтымында, күйөөсү буга чейин да жанын кыюуга аракет кылган. Ушу тапта сот-биологиялык жана сот-медициналык экспертиза дайындалды.
ИИМдин ички иликтөө кызматы тарабынан аталган факты боюнча тергөө иштери жүрүүдө.
Милиционер ички иштер органдарында 2011-жылдан тарта иштейт, эки баласы бар.
