БИШКЕК, 4-дек. — Sputnik. Бишкек ШИИБине экинчи нике тууралуу тактоолор үчүн чакырылган мурдагы муфтий Чубак Жалилов кеп болуп жаткан аял анын жөн гана сүйүктүүсү экенин айтты. Бул тууралуу шаардык милициянын маалымат кызматынан билдиришти.
"Чубак Жалилов менен маектешүү учурунда ал сөз болуп жаткан аялды сүйүктүүм деп эсептей турганын, бирок аны менен жарандык дагы, расмий дагы никеде турбаганын айтты. Ошондой эле ал мыйзам алдындагы жубайынан гана балдары бар экенин кошумчалады", — деп айтылат билдирүүдө.
Мындан тышкары, Чубак ажы эч кимди Кыргызстандын мыйзамдарын бузууга чакырбаганын белгилеген.
Учурда ар тараптан текшерүүлөр жүрүп жатканы, анын жыйынтыгында кошумча маалыматтар берилери кошумчаланды.
