БИШКЕК, 1-дек. — Sputnik. Американын Мичиган штатынын жашоочусу үйүнө чоочун бирөө киргендигин унитаздын түшүрүлгөн капкагынан улам байкап койгон. Бул туурасында РИА Новости Record Eagle басылмасына таянып жазды.
Жергиликтүү полициянын жетекчиси Жефф О'Бриендин айтымында, Траверс-Сити калаасынын жашоочусу аларга кайрылып, жардам сураган.
Жалгыз жашаган киши үйүнө чоочун бирөөлөр киргендигин эртең менен турары менен дароо байкаган. Ага унитаздын адатта ар дайым ачылып турган капкагынын жабылып калганы себепкер болгон. Мындай өзгөрүүнү байкаган кожоюн акырындык менен айланасындагы буюмдарга абай салган. Кимдир бирөөлөр тамак-ашын жеп, конок бөлмөдө жаткандай из калган.
Үйгө чакыруу менен келген полиция гаражда столдун алдында мас болуп уктап калган 26 жаштагы чоочун кишини таап чыккан. Ал мас болгону менен түндө кожоюндун намыянын, ооруну басаңдаткан дарыларын жана башка майда буюмдарын кымырып алганга жетишкен.
