МИНСК, 29-ноя. — Sputnik. Президент Сооронбай Жээнбеков Россия лидери Владимир Путинге Кыргызстандын мамлекеттик жогорку сыйлыгы – I даражадагы "Манас" орденин тапшырды. Бул туурасында Жээнбеков журналисттерге өзү билдирди.
Россия лидери эки өлкөнүн ортосундагы биримдикти жана өнөктөштүктү өнүктүрүүгө кошкон зор салымы үчүн сыйлыкка татыган.
Жээнбеков Россияга болгон иш сапарынын алкагында эки мамлекеттин ортосундагы, Евразиялык биримдиктин алкагында өз ара кызматташуу боюнча актаулдуу делген маселелер талкуулангандыгын белгиледи.
"Мага Кыргызстандын жогорку мамлекеттик сыйлыгы болгон I даражадагы "Манас" орденин Кыргызстан менен Россиянын достугун бекемдөө жана өнөктөштүгүн арттыруудагы кошкон бараандуу салымы үчүн Владимир Владимирович Путинге тапшыруу мүмкүнчүлүгү жаралды. Алардын бизди жылуу кабыл алганы мага жагымдуу болду. Владимир Владимирович Россия тараптан мурдатан бери колдоо көрсөтүлүп келе жаткандыгын жана ал мындан ары уланаарын билдирди", — деди Жээнбеков.
Президент Жээнбековдун Россияга иш сапары аяктап, ал ЖККУнун Белоруссияда өтө турган саммитине катышуу үчүн Минскиге келип түштү.
"Манас" орденинин үч даражасы бар. Андан жогору турган сыйлык "Кыргыз Республикасынын Баатыры" наамы, мында "Ак-Шумкар" белгиси кошо тапшырылат. Ал эми калган орден-медалдардын даражасы ылдый тургандыктан, аларды төшкө, "Манас" орденинин сол жагына тагат.
