БИШКЕК, 26-ноя — Sputnik. Алдын ала маалыматтарга караганда, Египеттеги жардыруудан жабырлангандардын арасында кыргызстандыктар жок. Бул туурасында ТИМдин маалымат кызматы кабарлады.
"Кыргызстандын Сауд Аравиясындагы элчилиги учурда Египеттеги кыргыз диаспорасы менен тыгыз байланышта болуп жатат", — деп айтылат таратылган маалыматта.
24-ноябрда согушкерлер мечиттеги намаз учурунда теракты жасап, андан соң аман калгандарды атып өлтүрүшкөн. Азырынча бул кандуу окуя боюнча жоопкерчиликти эч ким мойнуна ала элек. Анткени менен кол салган 30-35ке чукул адам колуна "Ислам мамлекети" террордук уюмунун желегин кармап турганы тууралуу маалыматтар айтылууда.
Басылмалардын маалыматына караганда, 305 адам каза тапса, алардын 27си балдар болгон. Ал эми 128 киши жаракат алган.
