Ош шаарынын Жапалак айылында жашоочулардын эшектерин уурдоого шектелип эки жигит кармалды. Бул тууралуу Ош шаардык ички иштер башкармалыгынын маалымат катчысы Замир Сыдыков билдирди.
Ага ылайык, милиция кызматкерлери 18 жана 17 жаштагы Жапалак айылынын тургундарынын 2017-жылдын октябрь, ноябрь айларында өзүнүн айылдаштарына таандык болгон беш эшекти түнкүсүн уурдап кеткендигин аныкташкан.
"Алар уурдалган эшектерди кытай ишкерлерине ар бирин сегиз миң сомдон сатып жиберишкен. Ыкчам иликтөө аракеттеринин натыйжасында шектүүлөр кармалып, алардын көрсөтмөсү менен эшектер турган жер аныкталган. Андан соң малдар ээлерине кайтарылып берилген. Аталган факты боюнча иш козголду", — деди Сыдыков.
Ал кылмышка шектүү жигиттер соттун чечими менен үй камагына чыгарылгандыгын кошумчалады.
