Манхэттендеги теракт: Өзбекстанда туулган кишиге айып тагылды

БИШКЕК, 22-ноя. — Sputnik. Нью-Йоркто Өзбекстанда туулган Сайфулло Саипов террорчулукка айыпталып жатат. Бул тууралуу РИА Новости АКШнын Юстиция министрлигине шилтеме берип жазып чыкты.

Шектүү Манхэттенде 31-октябрь күнү жүк ташуучу унаа менен элди койдурган деп айтылууда.

Жалпысынан Саипов сегиз адамды өлтүрүү (Манхэттенде унаа менен койдуруу учурунда), 12 адамды өлтүрүүгө аракет жасоо (окуядан жабыркагандар), "Ислам мамлекети" террордук тобунун идеясын ишке ашыруу, күч колдонуу жана транспорт каражатын иштен чыгаруу боюнча айыпталып жатат. Кармалган киши өмүр бою эркинен ажырап же өлүм жазасына тартылышы мүмкүн.

АКШнын Юстиция министрлигинин берген маалыматына караганда, айыпталуучу смартфон аркылуу көрүп жүргөн "Ислам мамлекети" террордук уюмунун роликтери ага таасир бергенин моюндаган. Кылмыш тууралуу Саипов бир жыл мурун эле ойлоно баштаган. Ал эми терактыга эки ай калганда көп адамды өлтүрүү үчүн атайын жүк ташуучу унааны тандап алган.

"Саипов жүк ташуучу унаанын алдына жана артына "Ислам мамлекети" террордук уюмунун желегин орнотуп алууну ойлогон. Бирок өзүнө ашыкча көңүл бурдурууну каалаган эмес. Ал ооруканадагы палатасына ИМдин желегин илип коюуну суранып, өзүн жакшы сезип жатканын билдирген", — деп ведомствонун маалыматында айтылат.

Сайфулло Саипов айдап бараткан жүк ташуучу унаа алдынан чыккан велосипедчендерди коюп, кийин окуучулар бараткан автобусту сүзгөн. Шектүү пейнтболдун пистолети менен сыртка чыкканда полиция кызматкерлери ага карата ок чыгарган. Саипов кармалып, ооруканага жеткирилген.