Нуракун уулу: журналисттин бир эле күндө атымды чыгарам дегени туура эмес
Журналисттин бир эле күндө атымды чыгарам дегени туура эмес. Бул тууралуу Жогорку Кеңештин басма сөз кызматынын жетекчиси Ибраим Нуракун уулу Sputnik Кыргызстан радиосуна маек куруп жатып билдирди.
Анын айтымында, журналист 10, 20 жыл эмгектенип туруп анан гана атын чыгарганы туура болот.
"Журналист атактуу болушу керек. Бирок бир күндө эмес. Менин оюмча журналист 10, 20 жыл иштеп атактуу болсо туура. Сенсацияны кууп, бир эле күндө атымды чыгарам деген болбойт. Анын жолун тосо албайсың. Бирок бир күндө келген даңк, бир күндө жок болот", — деди Нуракун уулу.
Ал журналистикада өчпөс из калтырган Салижан Жигитов, Алым Токтомушев, Абдиламит Матысаков, Мелис Эшимкановдордон үлгү алуу керек экендигин кошумчалады.
